नेपाली राष्ट्रिय क्रिकेट टिमका कप्तान रोहितले नेपाली टिममा स्पिनर सन्दीप लामिछाने जोडिनुले धेरै फाइदा हुने बताएका छन् । उनले सन्दीप खेल्नेगरी आएपछि खेल जित्ने आत्मावल बढेको बताए ।

आईसीसी टी– २० विश्वकपअन्तर्गत आफ्नो दोस्रो खेलको पूर्वसन्ध्यामा आयोजित पत्रकार सम्मेलनमा पौडेलले वेस्ट इन्डिजको पिच स्पिनर बलरका लागि धेरै नै राम्रो रहेको बताए । विकेटटेकर बलर लामिछाने टिममा भित्रिएकाले उनको अनुभव र उत्कृष्टतामा नेपाललाई झनै खेल जित्ने अवसर हुने पौडेलको भनाइ छ । ‘वेस्ट इन्डिजको पिच स्पिनरका लागि एकदमै राम्रो छ । विकेटटेकर बलर एड भएको छ, अनुभव पनि छ, दाइको टी– २० मा । अब राम्रो हुनेछ, पौडेलले भने ।

श्रीलंकालाई हराउने अवसर नेपालसामु रहेकाले सोहीअनुसार खेल्ने रणनीति बनाएको पौडेलले बताए । उनले १४० सम्मको स्कोर बनाउने टिमले जित हात पार्ने उल्लेख गरे । श्रीलंका टिम राम्रो छ । हामीलाई भन्दा बढी प्रेसर श्रीलंकालाई छ जस्तो लाग्छ मलाई । धेरैजसो डट बल भइरहेको छ । १४० बनाउन सक्यो भने जित्ने सम्भावना हुन्छ, पौडेलले भने, सुरुवाती ब्याट्सम्यानले राम्रो गर्न सके सबैमा आत्मविश्वास आउँछ । हामी बलियो टिम र भोलिको गेमलाई लिएर उत्साहित छौँ । यो टुर्नामेन्ट अपडाउन भइरहेको छ । प्रेसरलाई सहेर खेल्ने टिमले नै जित्छ ।’